Winters Anfang (Klaus Groth)

De Snee ut 'n Heben

kummt eben, alleben

in Grimmelgewimmel

hendal ut'n Himmel,

hendal ut de Wulken

as Duben, as Swulken,

as Feddern, as Dun'

op de Hüs, op 'n Tun,

as Dun' un as Feddern:

Fru Meddern! Fru Meddern!

Herinner! Krup ünner

un roop alle Kinner!

De Höhner, de Küken!

Schüllt kamen, schüllt kieken!

Schüllt kieken un sehn,

de groten, de kleen'n

alleben, alleben

den Snee ut 'n Heben.